काठमाडौँ – नेपालमा एकैपटक थप ५३ जनामा कोरोना संक्रमण पुष्टि भएको छ । आइतबार बाँकेमा क्वारेन्टिमैँ मृत्यु भएका बाँकेका २५ वर्षीय युवासँगै रहेका ४७ जनामा कोरोना संक्रमण पुष्टि भएको हो ।
स्वास्थ्य तथा जनसंख्या मन्त्रालयका सहप्रवक्ता डा समिरकुमार अधिकारीले कोरोना संक्रमणबाट मृत्यु भएका युवासँगै रहेका ४७ जनामा कोरोना संक्रमण भएको पाइएको पुष्टि गरे । भेरी अस्पतालस्थित प्रयोगशालामा भएको बाँकेमा ४७ जना मध्ये एक जना महिला र ४६ जना पुरुष रहेको मन्त्रालयले जनाएको छ । १९० जनाको कोरोना परीक्षण गर्दा ४७ जनाको रिपोर्ट पोजेटिभ आएको स्वास्थ्य तथा जनसंख्या मन्त्रालयले जनाएको छ ।
गत वैशाख ३० मा भारतको मुम्बईबाट आएर बाँकेको नरैनापुर गाउँपालिकास्थित क्वारेन्टिनमा रहेका युवाको आइतबार निधन भएको थियो । हालसम्म दुई जनाको मृत्यु भएको छ भने ३६ जना उपचारपछि निको भएका छन् ।
