नेपालमा कोरोना भाइरस (कोभिड–१९) संक्रमण वृद्धिमा पछिल्ला दिनमा दैनिक नयाँ रेकर्ड हुन थालेको छ । केही सातायता दैनिक औसतमा तीन हजार मुनि रहेको कोरोना संक्रमणदर सोमबार, सोमबार भन्दा मंगलबार ह्वात्तै बढेको छ ।
पछिल्लो २४ घन्टामा देशभर ३ हजार ८ सय ९९ जना कोरोना संक्रमित थपिएका छन् । यसअघि सोमबार तीन हजार चार सय २१ जनामा कोरोना संक्रमण पुष्टि भएको थियो ।
स्वास्थ्य तथा जनसंख्या मन्त्रालयका अनुसार मंगलबार पिसिआर परीक्षणमा दुई हजार सात सय २६ र एन्टिजेन परीक्षणमा एक हजार एक सय ७३ जनामा संक्रमण देखिएको छ । मन्त्रालयका अनुसार १२ हजार ६ सय ५५ जनाको पिसिआर परीक्षण र चार हजार आठ सय ६३ जनाको एन्टिजेनबाट परीक्षण गरिएको थियो ।
मन्त्रालयका अनुसार मंगलबार एक हजार सात सय ७८ जना कोरोना संक्रमणमुक्त भएका छन् । त्यस्तै, थप २० जना कोरोना संक्रमितको मृत्यु भएको छ ।यससँगै कोरोना संक्रमणबाट मृत्यु हुनेको संख्या हालसम्म नौ हजार सात सय ५८ पुगेको मन्त्रालयले जनाएको छ ।
