खुल्लापाटी खुल्ला बहस : पोखरा महानगरमा अनलाइन र कोरोनापछिको शैक्षिक तयारी (भिडियोसहित)

काठमाडौँ – पोखरा महानगरपालिकामा अनलाइन शिक्षा बन्द गरिएको सहित कोरोनापछि पोखराको शैक्षिक अवस्था के होला भन्नेबारे शनिबार खुल्लापाटी डट कमको खुल्ला बहस भयो ।

बहसमा प्याब्सन कास्कीका अध्यक्ष एवं गोल्डेन नेचर बोर्डिङ स्कुलका सञ्चालक प्रेम शर्मा, एकीकृत अखिल नेपाल शिक्षक संगठनका पोखरा महानगरका अध्यक्ष भुवन सुबेदी, शिक्षक संघ गण्डकी प्रदेश अध्यक्ष शिरोमणि लामिछाने, र अभिभावक महासंघबाट केन्द्रीय सदस्य एवं कास्की अध्यक्ष शोभाकर भण्डारीले भाग लिए ।

बहसमा सहभागीले स्थानीय तहले आगामी शैक्षिक गन्तव्यबारे ध्यान दिनुपर्ने बताए । तत्कालका लागि शैक्षिक सत्रमा कुनै असर नपरेपनि लकडाउन लामो समयसम्म रहिरहेमा शैक्षिक क्षेत्रमा असर पर्नसक्ने उनीहरुको तर्क थियो ।

खुल्लापाटीले लकडाउनको समयमा घरमैँ रहनुभएका अभिभावक, बालबालिका, शैक्षिक, खेलकुद क्षेत्रका सरोकारवालाहरुलाई विभिन्न क्षेत्रका विषयगत विज्ञमार्फत जानकारी गराउने उद्देश्यले खुल्ला बहस सञ्चालन गर्ने गरेको छ । श्रृङखला दिउँसो १ बजेपछि खुल्लापाटीको पेजमार्फत लाइभ हुने भएकाले श्रृङखला प्रत्यक्ष हेर्न चाहनेले खुल्लापाटी डटकमको फेसबुक पेज लाइक गरी हेर्न सक्नुहुनेछ ।